श्री श्री जगन्नाथ मंदिर (इस्कॉन पाचोरा) तर्फे आयोजित श्रीमद् भगवद्गीता साप्ताहिक सत्संग शनिवार, दि. ०९ ऑगस्ट २०२५ रोजी सायं. ७:०० ते ८:३० वाजता शक्तिधाम कार्यालय, भडगाव रोड, पाचोरा येथे भक्तिमय वातावरणात संपन्न झाला.
सत्संगाला पाचोरा शहर तसेच परिसरातील भाविकांनी उत्स्फूर्त प्रतिसाद देत मोठ्या संख्येने उपस्थिती लावली. मंदिरे व सभागृह परिसरात “हरे कृष्ण… हरे राम…” या गजराने वातावरण दुमदुमले.
या प्रसंगी मुख्य प्रवचन श्रीमान साधुकृपा प्रभुजी यांनी दिले. “अधर्माचा नाश करून भगवंत श्रीकृष्णाने धर्माची स्थापना केली” या विषयावर त्यांनी गीतेतील (अध्याय ४, श्लोक ७-८) — “यदा यदा हि धर्मस्य ग्लानिर्भवति भारत, अभ्युत्थानमधर्मस्य तदात्मानं सृजाम्यहम्” — या वचनाचा आधार घेत सखोल विवेचन केले.
प्रभुजींनी सांगितले की द्वापारयुगाच्या शेवटी अधर्म, अन्याय, हिंसा आणि अहंकार यांचा प्रचंड उदय झाला होता. कंस, जरासंध, शिशुपाल, दुर्योधन यांसारख्या अधर्मी राजांच्या अत्याचारांपासून प्रजा भयभीत झाली होती. अशा वेळी भगवान श्रीकृष्ण अवतरले आणि केवळ अत्याचार्यांचा नाशच नाही तर अर्जुनाला गीतेच्या माध्यमातून धर्म, कर्तव्य, निष्काम कर्मयोग, भक्तियोग आणि आत्मज्ञान यांचे अमूल्य तत्त्वज्ञान दिले.
ते पुढे म्हणाले की, अधर्म केवळ ऐतिहासिक व्यक्तींमध्ये नव्हे तर आजच्या काळात लोभ, भ्रष्टाचार, हिंसा, मत्सर, फसवणूक, असत्य या रूपात आपल्या समाजात आणि मनातही वास करतो. प्रत्येकाने आपल्या आयुष्यात सत्य, न्याय, करुणा, संयम आणि ईश्वरनिष्ठा यांचा अंगीकार करून धर्मस्थापनेत आपला वाटा उचलला पाहिजे.
कार्यक्रमात सुंदर कीर्तन, गीतेचे श्लोक पठण, आणि सामूहिक नामस्मरण झाले. भाविकांनी भक्तिभावाने कीर्तनात सहभाग घेतला. शेवटी सर्वांना भगवान श्रीकृष्णाचा स्वादिष्ट महाप्रसाद दिला गेला.
आवाहन – आयोजकांनी सांगितले की प्रत्येक शनिवारी शक्तिधाम येथे तसेच प्रत्येक रविवारी इस्कॉन मंदिर पाचोरा येथे प्रवचन, सत्संग आणि कीर्तनाचे आयोजन केले जाते. सर्व भाविकांनी जास्तीत जास्त संख्येने उपस्थित राहून या आध्यात्मिक कार्यक्रमांचा लाभ घ्यावा.
Post a Comment
0 Comments